লামিলো বারিজে –
হিয়ে ঢুলেই-ঢালেই ফিরি এল’ এহল মোনর বুগত
আহ্ধিক খুজিয়ে ভাতঝরা ফুলোর তুম্বাচ্চান মাত্তল অহল’
সিয়েন দেগি –
হাই থুবোল্লি আহলফেলানির সান্যেপিদের উমেয়ে পোগন
সদর উয়ে এহলে এহলে হত্তা হত্তা স্ববনত উবোল-পাল ধানগজা।
লামিলো বারিজে –
জুমর লেজানি চুবে চুবে গীদ গায়
ছড়া থুমানিরে নাজেবার পাদাবাল্লে সুরে
সুগর আহ্ভা বেই যারগোই এহল মোনর উগুরে।
লামিলো বারিজে –
চেরোহিত্যে রানজুনি খারা অই সাতরঙর ছদগে
ঘুরুং-ঘারাঙ ফাদাবাজ এগজা দেবাপেরেগ ফেলেবার দজা
তেনেয়ে ওই উদে চিৎ, দেবংসি ন্যুও আহ্জা।
লামিলো বারিজে –
সাজিনালত গাদিবার ঝুক্কোল লদন অনতিত্যে হারকুজ্যে পো-ছাবা
মৌনে মৌনে ফিরি এল’ শাওন-আঝার মাজও আহ্ভা।
লামিলো বারিজে –
গাবুর মিলেই হুনহুনেই হুনহুনেই
ভরাত ভরাত বিয়োং আবেরেবার র’ তুলি
সুচ্চ্যেক বাজর ভিন্দেনিরোই তাত্তেসামর টানে
বিগুন বিজির ফুল্লো তুলিদোন আলামর ভাঁজে ভাঁজে
লাঙ স্ববন দেগি নুদি-থিন্দেমালাক্ক্যে আহ্ওজে।
লামিলো বারিজে –
মিধে পহন ঝড়ও ফুদোর ধারাজ লনেই
জুমদেজর বুগত ন্যুও ঘরান সাজেই
এজ’ এজ’ এজ’ এজ’ জুম্মো বাপ ভেই।
***কবিদেবো ম পল্লিম কবিদে বই ”কজ্জালর খুলুেঙাত এগথুব কবিদে” সিয়ত ছাবা উয়ে, সিয়ততুন পড়বোউনোর উধিজে ইয়তও সুমুরেই থুলুঙ্গি..